مریدوں پر شفقت :

            امیرِاَہلسنّت دَامَتْ بَرَکاتُہُمُ الْعَالِیَہْ کو سالہاسال سے کثرت ِ پیشاب کا عارضہ لاحق تھا۔ بالآخردسمبر 2002ء میں ڈاکٹروں نے آپریشن تجویز کیا جس کے لئے آپ ہی کے مطالبے پر نمازِ عشاء کے بعد کا وقت طے کیا گیا تاکہ آپ کی کوئی  نماز قضانہ ہونے  پائے ۔ آپریشن ہوجانے کے بعد نیم بے ہوشی کے عالم میں درد سے کراہنے یا چلانے کی بجائے آپ نے  وقتاً فوقتاً  جن کلمات کی بار بار تکرار کی وہ یہ تھے:

          ’’ سب لوگ گواہ ہوجاؤمیں مسلمان ہوں ،یا اللہ عَزَّوَجَلَّ! میں مسلمان ہوں ، میں تیرا حقیر بندہ ہوں ،… یارسول اللہ  محبوب صَلَّی اللہ تَعَالٰی عَلَیْہِ وَاٰلہٖ وَسَلَّم! میں آپ کا ادنیٰ غلام ہوں ، … اَلْحَمْدُ للہ عَزَّوَجَلَّ!  میں  غوث الاعظم  ( رضی اللہ تعالی عنہ ) کا غلام  ہوں ،…اے اللہ عَزَّوَجَلَّ! میرے  گناہوں  کو بخش دے،… اے   اللہ عَزَّوَجَلَّ ! میری  مغفرت  فرما،… اے اللہ عَزَّوَجَلَّ! میرے  ماں باپ  کی مغفرت فرما،…اے اللہ عَزَّوَجَلَّ! میرے  بھائی بہنوں  کی مغفرت فرما،… اے اللہ عَزَّوَجَلَّ ! میرے تمام مریدوں  کی  مغفرت  فرما،… اے   اللہ عَزَّوَجَلَّ ! (مجلس شورٰی کے مرحوم نگران)  حاجی مشتاق  کی مغفرت فرما،اے   اللہ عَزَّوَجَلَّ !تمام  دعوت ِ اسلامی والوں اور والیوں  کی مغفرت فرما،… اے   اللہ عَزَّوَجَلَّ!  محبوب صَلَّی اللہ تَعَالٰی عَلَیْہِ وَاٰلہٖ وَسَلَّم  کی ساری امت  کی مغفرت فرما۔… 

          دیکھا آپ نے کہ  امیرِاہلسنّت دَامَتْ بَرَکاتُہُمُ الْعَالِیَہْ اپنے  مُریدوں  سے کس قدر  محبت  فرماتے ہیں کہ نیم بے ہوشی میں بھی وہ اپنے مریدوں کیلئے مغفِرت کی دعائیں مانگتے رہے یہاں تک کہ بقر عید(۱۴۲۳ھ) میں انہوں نے ایصالِ ثواب کیلئے ایک قربانی اپنے غریب مُریدوں کی طرف سے اورایک قربانی اپنے فوت شدہ مُریدوں کی طرف سے کی۔اس کے علاوہ آپ دَامَتْ بَرَکاتُہُمُ الْعَالِیَہْ اپنے تمام مریدوں کا ایمان بارگاہِ رسالت محبوب صَلَّی اللہ تَعَالٰی عَلَیْہِ وَاٰلہٖ وَسَلَّم میں حفاظت کے لئے پیش کردیتے ہیں۔

(تعارف امیر اہلسنت،ص۷۳)