تُوْبُوْا اِلَی اللہ! اَسْتَغْفِرُ اللہ
صَلُّوْا عَلَی الْحَبِیْب! صَلَّی اللہُ تَعَالٰی عَلٰی مُحَمَّد
میٹھے میٹھے اسلامی بھائیو! ہمیں اپنی جوانی کی قدْر کرنی چاہئے ورنہ بڑھاپے میں بعض اَوقات پچھتاوے کے سائے پریشان کرتے ہیں اور اُس وقْت کچھ بَن نہیں پڑتا، بندہ کچھ کرنا چاہتا ہے لیکن حوصلہ ساتھ نہیں دیتا، جوانی کو یاد کرتا ہے لیکن جوانی نے تَو واپس آنا نہیں اور بڑھاپے سے اُکتاتا ہے مگر اُس نے بھی جانا نہیں اور نہ اُس وقْت پچھتانے کا کوئی فائدہ ہے۔
جو آ کے نہ جائے وہ بڑھاپا دیکھا
جو جا کے نہ آئے وہ جَوانی دیکھی
میٹھے میٹھے اسلامی بھائیو! یقیناً جوانی کی عبادت کے بَہُت زِیادہ فضائل ہیں ، جوانی میں عبادت کرنے اور اپنے آپ کو گناہوں سے بچا کر رکھنے والے کو اللہ عَزَّوَجَلَّ کس طرح نوازتا ہے چُنانچِہ
صالِح نوجَوان کو ملنے والا اِنعام
دعوتِ اسلامی کے اِشاعتی اِدارے مکتبۃُ المدینہ کے مطبوعہ 56 صفْحات پر مشتمل رِسالے ’’کراماتِ فاروقِ اَعظم‘‘صَفْحَہ24 پرہے : مُشیرِرسول ، امیر المؤمنین حضرتِ سیِّدُناعُمَرفاروقِ اَعظم رَضِیَ اللہُ تَعَالٰی عَنْہ ایک مرتبہ ایک صالِح(یعنی پرہیزگار) نوجوان کیقَبْر پر تشریف لے گئے اورفرمایا : اے فلاں ! اللہ عَزَّوَجَلَّ نے وعدہ فرمایا ہے :
وَ لِمَنْ خَافَ مَقَامَ رَبِّهٖ جَنَّتٰنِۚ(۴۶) (پ ۲۷، الرَّحمٰن : ۴۶)
ترجمۂ کنز الایمان : اور جو اپنے ربّ کے حُضُور کھڑے ہونے سے ڈرے اُس کے لیے دو جنّتیں ہیں۔
اے نوجوان!بتا! تیرا قَبْر میں کیا حال ہے؟ اُس صالِح(باعمل) نوجوان نے قَبْرکے اندر سے آپ رَضِیَ اللہُ تَعَالٰی عَنْہ کا نام لے کر پکارا اوربآوازِ بلند دو مرتبہ جواب دیا : ’’قَدْ اَعْطَانِیْہِمَا رَبِّی عَزَّوَجَلَّ فِی الْجَنَّۃِ یعنی میرے ربّ عَزَّوَجَلَّ نے یہ دونوں جنّتیں مجھےعطا فرما دی ہیں ۔‘‘ (تاریخ مدینہ دمشق، ۴۵/ ۴۵۰)
صَلُّوْا عَلَی الْحَبِیْب! صَلَّی اللہُ تَعَالٰی عَلٰی مُحَمَّد
سُبْحٰنَ اللہ عَزَّوَجَلَّ !اِس واقعے سے پتا چلا کہ جوشخص نیکیوں بھری زندَگی گزارے گا اور خوفِ خدا عَزَّوَجَلَّ سے لرزاں وتَرساں رہے گا ، وہ اللہ عَزَّوَجَلَّ کی رحمتِ کاملہ سے دو جنّتوں کا مستحق ٹھہرے گا۔لہٰذا جَوانی کو نیکی وپرہیز گاری میں صَرْف کیجئے، خواہشاتِ نفسانی کی پیروی سے بچئے، ابھی سے سنبھل جائیے! یاد رکھئے! یہ حُسْن وجَوانی دولتِ فانی ہے اور اِس پر غرور و تَکَبُّر حَماقت ونادانی ہے۔
ڈھل جائے گی یہ جوانی جس پہ تجھ کو ناز ہے تُو بجا لے چاہے جتنا چار دن کا ساز ہے
صَلُّوْا عَلَی الْحَبِیْب! صَلَّی اللہُ تَعَالٰی عَلٰی مُحَمَّد
تُوْبُوْا اِلَی اللہ اَسْتَغْفِرُ اللہ
صَلُّوْا عَلَی الْحَبِیْب! صَلَّی اللہُ تَعَالٰی عَلٰی مُحَمَّد
میٹھے میٹھے اسلامی بھائیو!اب دو عابد وخائف نوجوانوں کے حیرت انگیز واقعات مُلاحَظہ فرمائیے اور دیکھئے کہ یادِ خدا عَزَّوَجَلّ سے دلوں کو آباد کرنے والوں کو کیسی کرامات سے نوازا جاتا ہے چُنانچِہ