ارشاد ِپاک ہے:
یٰۤاَیُّهَا الَّذِیْنَ اٰمَنُوا اجْتَنِبُوْا كَثِیْرًا مِّنَ الظَّنِّ٘-اِنَّ بَعْضَ الظَّنِّ اِثْمٌ
ترجَمۂ کنزالایمان: اے ایمان والو! بَہُت گُمانوں سے بچو بیشک کوئی گُمان گناہ ہو جاتا ہے۔
حضرتِ علّامہ عبد اللّٰہ بن عمر شیرازی بَیضاوی عَلَیْہِ رَحْمَۃُ اللہِ القَوِیکثرتِ گُمان سے مُمَانَعَت کی حِکمت بیان کرتے ہوئے ’’ تفسیر بَیضاوی‘‘ میں لکھتے ہیں: ’’ تاکہ مسلمان ہر گُمان کے بارے میں مُحْتاط ہوجائے اور غور وفِکْر کرے کہ یہ گُمان کس قَبِیل (یعنی قِسْم ) سے ہے ۔ ‘‘ (آیا اچّھا ہے یا بُرا؟ ) (تفسیر بیضاوی، ج۵، ص۲۱۸)
اِس آیت ِکریمہ میں بعض گُمانوں کو گناہ قرار دینے کی وجہ بیان کرتے ہوئے اِمام فخرُالدّین رازِی عَلَیْہِ رَحْمَۃُ اللہِ الْھَادِی لکھتے ہیں: ’’ کیونکہ کسی شخص کا کام (بعض اوقات) دیکھنے میں تو بُرا لگتا ہے مگر حقیقت میں ایسا نہیں ہوتا، ممکِن ہے کہ کرنے والا اسے بھول کر کررہا ہو یا دیکھنے والا ہی خود غَلَطی پر ہو ۔ ‘‘ (تفسیرِ کبیر، ج ۱۰ ، ص ۱۱۰)
دو فرامینِ مصطَفٰے صَلَّی اللہُ تَعَالٰی عَلَیْہِ وَاٰلِہٖ وَسَلَّمَ: (۱) بدگُمانی سے بچو بے شک بدگُمانی بدترین جھوٹ ہے ۔ ( بُخاری، ج۳، ص۴۴۶، حدیث: ۵۱۴۳) (۲) مسلمان کا خون ، مال اور اس سے بدگُمانی (دوسرے مسلمان پر) حرام ہے ۔ (شُعَبُ الْاِیمان ، ج۵، ص۲۹۷، حدیث: ۶۷۰۶)
بدگُمانی سے مُراد یہ ہے کہ ‘’ بِلا دلیل دوسرے کے بُرے ہونے کا دل سے اعتقادِجازِم (یعنی یقین) کرنا۔ ‘‘ ( ماخوذ اَز: فَیضُ القدیر ، ج ۳، ص۱۲۲، تحتَ الحدیث: ۲۹۰۱وغیرہ) بدگمانی سے بُغض اور حَسَد جیسے باطِنی اَمراض بھی پیدا ہوتے ہیں۔
اللّٰہ عَزَّ وَجَلَّ کے مَحبوب، دانائے غُیُوب، مُنَزَّہٌ عَنِ الْعُیوب صَلَّی اللہُ تَعَالٰی عَلَیْہِ وَاٰلِہٖ وَسَلَّمَکا فرمانِ عالیشان ہے : حُسْنُ الظَّنِّ مِنْ حُسْنِ الْعِبادَۃِ۔ یعنی ’’ اچّھا گُمان اچّھی عبادت سے ہے۔ ‘‘ ( ابوداوٗد، ج۴، ص۳۸۷، حدیث: ۴۹۹۳)
خدایا عطا کردے رحمت کا پانی
رہے قلب اُجلا دُھلے بدگمانیؑ
حُجَّۃُ الْاِسلام حضرت سیِّدُنا امام ابوحامد محمدبن محمدبن محمد غزالی عَلَیْہِ رَحْمَۃُ اللہِ الوالیفرماتے ہیں: ’’ بدگُمانی کے حرام ہونے کی وجہ یہ ہے کہ دِل کے بھیدوں کوصِرْف اللہ تَعَالٰیجانتا ہے، لہٰذا تمہارے لئے کسی کے بارے میں بُرا گُمان رکھنا اُس وَقْت تک جائز نہیں جب تک تم اُس کی بُرائی اِس طرح ظاہِر نہ دیکھو کہ اس میں تاویل (یعنی بچاؤ کی دلیل) کی گنجائش نہ رہے، پس اُس وَقْت تمہیں لامُحالہ (یعنی ناچار) اُسی چیز کا یقین رکھناپڑے گا جسے تم نے جانا اور دیکھا ہے اور اگر تم نے اُس کی برائی کو نہ اپنی آنکھوں سے دیکھا اورنہ ہی کانوں سے سنا مگر پھر بھی تمہارے دِل میں اس کے بارے میں بُرا گُمان پیدا ہو تو سمجھ جاؤ کہ یہ بات تمہارے دِل میں شیطان نے ڈالی ہے، اس وَقْت تمہیں چاہئے کہ دِل میں آنے والے اُس گُمان کو جُھٹلا دو کیونکہ یہ (بدگمانی) سب سے بڑا فِسْق ہے۔ ‘‘ مزید لکھتے ہیں: ’’ یہاں تک کہ اگر کسی شخص کے منہ سے شَراب کی بُو آرہی ہو تو اُس کوشَرْعی حد لگانا جائز نہیں کیونکہ ہوسکتا ہے کہ اُس نے شراب کا گُھونٹ بھرتے ہی کلّی کردی ہو یا کسی نے اُسے زبردستی شَراب پِلادی ہو ، جب یہ سب احْتِمالات (یعنی شُبُہات) موجود ہیں تو (ثُبُوتِ شَرْعی کے بِغیر) مَحْض قَلْبی خَیالات کی بِنا پر تصدیق کردینا اور اس مسلمان کے بارے میں (شرابی ہونے کی) بدگُمانی کرنا جائز نہیں ہے ۔ ‘‘ (اِحیاءُ الْعُلوم، ج۳، ص۱۸۶)