اللہ عَزَّ وَجَلَّ ہی کی مدد سے توفیق مُیَسَّرآتی ہے ) ( فتاوٰی رضویہ ج۲۲ص۲۰۴مُلَخَّصًا ) مولانا جلالُ الدّین رُومی قُدِّسَ سِرُّہُ العزیز مَثنوی شریف میں فرماتے ہیں :
تا تُوانی دُور شَواَز یارِ بد مارِ بَد تَنہا ہَمِیں بَرجاں زنَد
یارِ بد بدتر بُوَد اَز مارِ بد یارِ بد برجان و بر ایماں زَند
( یعنی جب تک ممکن ہو بُرے یار ( ساتھی ) سے دُور رہو کیونکہ بُرا ساتھی بُرے سانپ سے بھی زیادہ خطرناک اور نقصان دہ ہے ، اس لئے کہ خطرناک سانپ تو صرف جان یعنی جسم کوتکلیف یانقصان پہنچاتا ہے جبکہ بُرا ساتھی جان اور ایمان دونوں کو برباد کر دیتا ہے ) ۔ (گلد ستہ مثنوی ص۹۴)
اسلامی بہنو! بُری صُحبت میں ہلاکت ہی ہلاکت اور اچھّی صُحبت اور اچّھوں سے مَحَبَّت و نِسبت میں ہر طرح سے عافیّت ہے ۔ دعوتِ اسلامی کے مَدَنی ماحول کی بَرَکتوں کے کیا کہنے !بربادیٔ آخرت پر چلنے والی کتنی ہی اسلامی بہنوں کو راہِ جنّت پر سفر نصیب ہوگیا، ایسی ہی ایک مَدَنی بہار سنئے ، چنانچہ بابُ المدینہ (کراچی )کی ایک اسلامی بہن کا بیان کچھ یُوں ہے کہ میں دنیا کی رنگینیوں میں گُم اورامتحانِ آخرت سے بے فکر ہو کرزندگی کے ایام گزار رہی تھی ۔ ایک دن دعوتِ اسلامی کے مشکبار مَدَنی ماحول سے وابَستہ کسی اسلامی بہن نے اِنفِرادی کوشش کرتے ہوئے مجھے عالَمی مَدَنی مرکز فیضانِ مدینہ کے تہ خانے میں ہونے والے اسلامی بہنوں کے سُنَّتوں بھرے اجتماع میں شرکت کی دعوت دی ۔ اُن کی شفقت کے نتیجے میں مجھے سنّتوں بھرے اجتماع میں شرکت کی سعادت نصیب ہوئی، وہاں مَدَنی اِنعامات سے مُتَعلِّق بیان جاری تھا، میں نے ہمہ تن گوش ہو کربیان سننا شروع کردیا ۔ بیان انتِہائی پُرسوز تھا مجھ پر ایکدم رقّت طاری ہوگئی اور میرے بدن کا رُواں رُواں خوفِ خداعَزَّوَجَلَّکی وجہ سے کانپ اُٹھا ۔ بیان کے اختِتام پر میں نے سچّے دل سے نیّت کی کہ اِنْ شَآءَاللہ عَزَّ وَجَلَّ آئندہ زندگی مَدَنی اِنعامات پر عمل کرتے ہوئے گزاروں گی ۔ پھر مَدَنی اِنعامات پر عمل کی برکت سے مَدَنی بُرقع پہننے کی سعادت بھی نصیب ہو گئی ہے ۔ اب میں نے اپنی زندگی کو اس مَدَنی مقصدکے تحت گزارنے کا عزم کیاہوا ہے کہ ’’مجھے اپنی اور ساری دنیا کے لوگوں کی اصلاح کی کوشش کرنی ہے ۔ ‘‘ ان شاء اللّٰہ عَزَّ وَجَلَّ اپنی اصلاح کے لئے مَدَنی انعامات پر عمل کرنا ہے اور ساری دنیا کے لوگوں کی اِصلاح کی کوشِش کے لئے گھر کے مَحرم مردوں کو مَدَنی قافِلے میں سفر کروانا ہے ۔
دے جذبہ ’’مدنی انعامات‘‘ کا تو کرم ہو دعوتِ اسلامی پر یہ
کرم بہرِ شہِ کرب و بلا ہو شریک اس میں ہر اِک چھوٹا بڑا ہو
صَلُّوا عَلَی الْحَبِیْب! صَلَّی اللہُ تَعَالٰی عَلٰی مُحَمَّد
883 اجتماعات
اسلامی بہنو!ابھی آپ نے ان دنوں کی مَدَنی بہار ملا حَظہ فرمائی جب دعوتِ اسلامی کے عالمی مَدَنی مرکز ہی میں اسلامی بہنوں کا ہفتہ وار سنّتوں بھرا اجتِماع ہو تا تھا! اب مَدَنی مرکز نے ہر اتوار کو دوپہر ڈھائی بجے ہونے والے اس ایک اجتماع کو تادمِ تحریر تقریباً 37 مقامات پر تقسیم کردیا ہے ۔ جُوں جُوں مَدَنی آقا صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کی عاشقاؤ ں کی تعداد بڑھتی جائیگی اِن شاءَاللّٰہ عَزَّ وَجَلَّ تو ں توں تقسیم کا سلسلہ بھی مزید جاری رہے گا ۔ علاوہ ازیں اَلْحَمْدُ لِلّٰہ عَزَّوَجَلَّہر بدھ کی دوپہر کو بابُ المدینہ کراچی میں ذیلی سطح پربھی تادمِ تحریر تقریباً 883 مقامات پرہفتہ وار سنّتوں بھرے اجتماعات ہوتے ہیں ۔
مَدَنی اِنْعامات کس کیلئے کتنے ؟
اِس پُرفتن دور میں آسانی سے نیکیاں کرنے اورگناہوں سے بچنے کے طریقۂ کار پر مشتمل شریعت وطریقت کا جامِع مجموعہ بنام ’’مَدَنی انعامات‘‘بصورتِ سُوالات مُرتّب کیا گیا ہے ۔ اسلامی بھائیوں کیلئے 72، اسلامی بہنوں کیلئے 63، طَلَبۂ علمِ دین کیلئے 92 ، دینی طالِبات کیلئے 83، مَدَنی مُنّوں اورمَدَنی مُنّیوں کیلئے 40جبکہ خُصُوصی اسلامی بھائیوں (یعنی گونگے بہروں ) کے لئے 27 مَدَنی اِنعامات ہیں ۔ بے شمار اسلامی بھائی ، اسلامی بہنیں اورطَلَبہ مَدَنی اِنعامات کے مطابِق عمل کرکے روزانہ سونے سے قبل ’’فکرِمدینہ کرتے ہوئے ‘‘ یعنی اپنے اعمال کا جائزہ لے کر مَدَنی اِنْعامات کے جیبی سائز رسالے میں دیئے گئے خانے پُر کرتے ہیں ۔ ان مَدَنی اِنْعامات کواِخلاص کے ساتھ اپنا لینے کے بعد نیک بننے اورگناہوں سے بچنے کی راہ میں حائل رُکاوٹیں اللہ عَزَّ وَجَلَّ کے فضل وکرم سے اکثر دُور ہوجاتی ہیں اوراس کی بَرَکت سے اَلْحَمْدُ لِلّٰہعَزَّوَجَلَّ پابند ِ سنّت بننے ، گناہوں سے نفرت کرنے اور ایمان کی حفاظت کے لئے کُڑھنے کا ذِہن بھی بنتا ہے ۔ سبھی کو چاہئے کہ باکردار مسلمان بننے کے لئے مکتبۃُ المدینہ کی کسی بھی شاخ سے مَدَنی انعامات کا رسالہ حاصل کریں اورروزانہ فکرِمدینہ (یعنی اپنا مُحاسبہ) کرتے ہوئے اس میں دئیے گئے خانے پُر کریں اورہجری سِن کے مطابق ہر مَدَنی یعنی قمری ماہ کے ابتِدائی دس دن کے اندر اندر اپنے یہاں کے مَدَنی اِنعامات کے ذمّے دار کو جمع کروانے کا معمول بنائیں ۔
تُو ولی اپنا بنا لے اس کو ربِّ لم یَزَل مدنی انعامات پر کرتا رہے جو بھی عمل