(ذوقِ نعت)
صَلُّوا عَلَی الْحَبِیْب! صَلَّی اللہُ تَعَالٰی عَلٰی مُحَمَّد
(۸) وَعَلَیْکَ السَّلامُ یَا وَلَدِیْ
حضرت شیخ سیِّد نورُالدِّین اِیْجِی رَحْمَۃُ اللہِ تَعَالٰی عَلَیْہِ جب روضہ اَقدَس پر حاضِر ہوئے تو عرض کیا: اَلسَّلامُ عَلَیْکَ اَیُّھا النَّبِیُّ وَرَحمَۃُ اللہِ وَبَرَکاتُہٗ تو جتنے لوگ اُس وَقْت وہاں حاضِرتھے اُن سب نے سُنا کہ روضۂ اَنور سے جواب آیا : وَعَلَیْکَ السَّلامُ یَاوَلَدِیْ (یعنی اور تجھ پر سلام ہو اے میرے بیٹے! ) ۔ (اَلْحاوِی لِلفَتاوی ج ۲ ص۳۱۴) اللہ عَزَّ وَجَلَّ کی اُن پر رَحمت ہو اور اُن کے صَدقے ہماری بے حساب مغفِرت ہو۔ اٰمِیْن بِجَاہِ النَّبِیِّ الْاَمِیْن صَلَّی اللہ تَعَالٰی عَلَیْہِ وَاٰلہٖ وَسَلَّم
تم کو تو غُلاموں سے ہے کچھ ایسی مَحَبَّت
ہے تَرکِ اَدب ورنہ کہیں ہم پہ فِدا ہو!
(ذوقِ نعت)
صَلُّوا عَلَی الْحَبِیْب! صَلَّی اللہُ تَعَالٰی عَلٰی مُحَمَّد
(۹) وَعَلَیکُمُ السَّلامُ یا مُحَمَّد ہاشِمُ الْتَتوی
شیخ الاسلام حضرتِ سیِّدُنا مخدوم محمد ہاشم ٹَھٹھوی عَلَیْہِ رَحْمَۃُ اللہِ القَوِی نے جب مدینۃُ الْمُنوَّرہ زَادَھَا اللہُ شَرَفاً وَّ تَعْظِیْماً میں روضۂ انورپر حاضِر ہو کر صلوٰۃ و سلام عَرْض کیا توپیارے پیارے آقا مکّی مَدَنی مصطَفٰے صَلَّی اللہ تَعَالٰی عَلَیْہِ وَاٰلہٖ وَسَلَّم کی آوازِ مبارَکہ سنائی دی : ’’وَعَلَیکُمُ السَّلامُ یا مُحَمَّد ہاشِمُ الْتَتوی۔ ‘‘ (انوارِ علمائے اہلسنّت، سندھ ص۷۱۴ ملخّصًا) اللہ عَزَّ وَجَلَّ کی اُن پر رَحمت ہو اور اُن کے صَدقے ہماری بے حساب مغفِرت ہو۔اٰمِیْن بِجَاہِ النَّبِیِّ الْاَمِیْن صَلَّی اللہ تَعَالٰی عَلَیْہِ وَاٰلہٖ وَسَلَّم
اے مدینے کے تاجدار سلام اے غریبوں کے غمگسار سلام
تیری اِک اِک ادا پہ اے پیارے سو دُرودَیں فِدا ہزار سلام
(ذوقِ نعت)
صَلُّوا عَلَی الْحَبِیْب! صَلَّی اللہُ تَعَالٰی عَلٰی مُحَمَّد
(۱۰) قَبر انور سے دَستِ مُبارَک نکلا
حضرتِ سیِّدُناشیخ سیِّد احمد کبیر رِفاعِی رَحْمَۃُ اللہِ تَعَالٰی عَلَیْہِ جب حج سے فارِغ ہوکرمدینۂ منوَّرہ زَادَھَا اللہُ شَرَفاً وَّ تَعْظِیْماً روضۂ اَنور پر حاضِر ہوئے تو عَرَبی میں دو اشعار پڑھے جن کا ترجَمہ یہ ہے: (۱) …دُوری کی حالت میں ، میں اپنی رُوح کو خدمتِ اَقدَس میں بھیجا کرتا تھا تو وہ میری نائب بن کر آستا نۂ مُبارَکہ کو چوما کرتی تھی (۲) …اور اب بدن کے ساتھ حاضِر ہو کر ملنے کی باری آئی ہے تو اپنا دَستِ مُبارَک دراز فرمائیے تاکہ میرے ہونٹ اُس کوچومیں ۔جونہی اَشعار ختم ہوئے دستِ اَنور قبرِ منوَّر سے باہَر نکلا اور اُنہوں نے اُس کو چوما۔ (اَلْحاوِی لِلفَتاوی ج ۲ ص ۳۱۴) اللہ عَزَّ وَجَلَّ کی اُن پر رَحمت ہو اور اُن کے صَدقے ہماری بے حساب مغفِرت ہو۔ اٰمِیْن بِجَاہِ النَّبِیِّ الْاَمِیْن صَلَّی اللہ تَعَالٰی عَلَیْہِ وَاٰلہٖ وَسَلَّم
واہ کیا جُود و کَرَم ہے شہِ بَطحا تیرا
’’نہیں ‘‘ سُنتا ہی نہیں مانگنے والا تیرا