فیضانِ مدینہ میں عاشقانِ رسول کے ہمراہ آخِری عشرۂ رَمَضانُ الْمبارَک کے اعتکا ف کی سعادت حاصِل کی۔ انہیں اعتکاف کی بہت سی بَرَکتیں حاصِل ہوئیں ، مِنْجُمْلَہ راہ چلتے ہوئے بازاری لڑکوں کی طرح فلمی گیت گانے کی جوعادت تھی وہ نکل گئی اور اَلْحَمْدُلِلّٰہِ عَزَّوَجَلَّاِس کی جگہ نعت شریف گنگنانے کی عادت پڑگئی۔ نیز زَبان کا قفلِ مدینہ لگانے ( یعنی بری تو بری غیر ضروری باتوں سے بھی بچنے ) کا ذِہن بنا اور ان کا ایسا ذہن بن گیا کہ جوں ہی منہ سے فضول بات سر زد ہوتی بطورِ کفارہ جھٹ زَبان پر دُرُود شریف جا ری ہو جا تا ۔
گیت گانے کی عادت نکل جا ئے گی ، مَدنی ماحول میں کر لو تم اعتکاف
بے جا بک بک کی خصلت بھی ٹل جا ئے گی، مَدنی ماحول میں کر لو تم اعتکاف (وسائل بخشش ص۶۴۲)
صَلُّو ا عَلَی الْحَبِیْب ! صَلَّی اللہُ تَعَالٰی عَلٰی مُحَمَّد
(۱۴) ماڈَرْن نوجوان ترقّی کرتے کرتے۔۔۔:
بمبئی (بائیکَلہ ، الھند) میں تبلیغِ قراٰن وسنّت کی عالمگیر غیر سیاسی تحریک ، دعوتِ اسلامی کی طرف سے آخِری عشرۂ رَمَضانُ الْمُبارَک (۱۴۱۹ ھ۔ 1998ء) میں ہونے والے اجتماعی اِعتکاف میں ایک ماڈَرن نوجوان نے (جو کہ الیکڑانک انجینئرہیں ) شرکت کی۔ دس دن تک عاشِقانِ رسول کی صحبت کا خوب فیض اُٹھایا ، مَدَنی آقا صَلَّی اللہُ تَعَالٰی عَلَیْہِ وَاٰلہٖ وسلَّم کی مَحَبَّت کی نشانی داڑھی مبارَک کا نور چہرے پر چھایا ، سبز سبز عمامہ شریف کا تاج سجا یا، اِعتکاف کی برکتوں نے ان کو سنتوں کا عظیم مبلّغ بنایا۔اَلْحَمْدُلِلّٰہِ عَزَّوَجَلَّوہ دین کی خدمتوں میں ترقی کرتے کرتے تادمِ تحریر ہند مکی کابینہ کے رُکن کی حیثیت سے سُنتوں کی بہاریں لٹانے میں کوشاں ہیں ۔
ساری فیشن کی مستی اُتر جا ئے گی، مدنی ماحول میں کر لو تم اعتکاف
زندَگی سنّتوں سے نکھر جا ئے گی، مدنی ماحول میں کر لو تم اعتکاف (وسائل بخشش ص۶۴۲)
صَلُّو ا عَلَی الْحَبِیْب ! صَلَّی اللہُ تَعَالٰی عَلٰی مُحَمَّد
زم زم نگر (حیدر آباد بابُ الاسلام سندھ پاکستان) کے ایک اسلامی بھائی بے نَمازی اور نشے کے عادی تھے، گھر والے ان کی وجہ سے پریشان تھے۔ خوش قسمتی سے تبلیغِ قراٰن وسنّت کی عالمگیر غیر سیاسی تحریک ، دعوتِ اسلامی کے تین روزہ سنتوں بھرے اجتماع ( صحرائے مدینہ، مدینۃ الاولیا ملتان) (۴۲۶ا ھ ۔2005ء) میں حاضری کی سعادت حاصل ہو گئی، وہیں اعتکاف کی نیت کی اور وقت آنے پر بابُ المدینہ کراچی پہنچ کر عالمی مَدَنی مرکز فیضانِ مدینہ کے اندر آخِری عشرۂ رَمَضانُ المُبارَک (۴۲۶ا ھ۔2005ء) میں معتکف ہوگئے۔ تین روزہ اجتماع (ملتان شریف) میں اگر چہ آخرت کی بہتری کے متعلق کافی ذہن بنا تھا مگر اجتِماعی اِعتِکاف کی تو کیا بات ہے!بس ان کے تو دل کی دنیا ہی بدل گئی، انہوں نے گناہوں سے پکی توبہ کی ، داڑھی مبارَک بڑھانی شروع کر دی، ہاتھوں ہاتھ سبز عمامہ شریف بھی سجا لیا ۔ اعتکا ف کے بعد جب زم زم نگر (حیدر آباد) پہنچے تو داڑھی اور عمامہ شریف میں دیکھ کر گھر والے اور پڑوسی وغیرہ سب حیرت زدہ رَہ گئے! اَلْحَمْدُلِلّٰہِ عَزَّوَجَلَّان کی نَشے کی عادت بھی بِالکل چھوٹ گئی ۔ اپنی بساط بھر دعوت اسلامی کا مَدَنی کام کرنا شروع کردیا، اللہ عَزَّوَجَلَّ کے فضل سے ان کی بیٹی نے دعوت اسلامی کے جا معۃ المدینہ میں شریعت کورس میں داخلہ لے لیاجبکہ دو مَدَنی منوں نے مدرسۃ المدینہ میں قراٰنِ پاک حفظ کرنا شروع کردیا۔
گر مدینے کا غم چشمِ نم چاہئے، مَدنی ماحول میں کر لو تم اعتکاف
مدنی آقا کی نظرِ کرم چاہئے، مَدنی ماحول میں کر لو تم اعتکاف (وسائل بخشش ص۶۴۲)
صَلُّو ا عَلَی الْحَبِیْب ! صَلَّی اللہُ تَعَالٰی عَلٰی مُحَمَّد
ڈیرہ اللہ یار (بلوچستان ، پاکستان ) کے ایک اسلامی بھائی گناہوں بھری زندگی میں بد مست رہتے ہوئے زندَگی کے دن گزار رہے تھے۔ اللہ عَزَّوَجَلَّ کا کروڑہا کروڑ اِحسان کہ ان کے شہر میں تبلیغِ قراٰن و سنّت کی عالمگیر غیر سیاسی تحریک، دعوت اسلامی کا مَدَنی کام شروع ہوا اور پہلی بار دعوت اسلامی کی طرف سے (۱۴۱۶ ھ۔1995ء) شبِ بَرَاءَت کا سنتوں بھرا اجتِماع ہوا، اَلْحَمْدُلِلّٰہِ عَزَّوَجَلَّانہوں نے اُس میں شرکت کی۔ اجتماع میں عاشِقانِ رسول کے داڑھی اور عمامے والے نورانی چہروں اور ان کی مَحَبَّت بھری ملاقاتوں نے انہیں دعوتِ اسلامی سے مُتأَثِّر تو کیا مگر وہ دُور ہی دُور رہے۔ ہفتہ وار اجتماع میں بھی کبھی شرکت نہیں کی حتّٰی کہ رَمَضانُ المُبارَک (۱۴۱۶ ھ۔1995ء) کی ستائیسویں شب آپہنچی، انہوں نے اجتِماع والی مسجِد میں ہونے والی اجتماعی دُعا میں حاضری دی ، اختتام پر اسلامی بھائیوں سے